كذا مرة اتسئلت عن ال CRM system وال ERP system وهما ايه اصلا؟ ونستخدم انهي نوع؟ وازاي الخ
فا خليني ممكن اعملها جزئين كده كده اتكلم فيها عنهم جزء لل CRM لوحده وجزء لل ERP لوحده
وبداية خليني ابدء بال CRM system :
اختصار لكلمة customer relation management – نظام ادارة العلاقات مع العملاء او زي ما انا بحب اقول نظام تطوير العلاقة مع العملاء
دلوقتي فيه عميل انا بقدم سيرفس وليكن شركة عقارات مثلا فبيكون عندي اعلان عن شقة او اعلان عن بروجكت كمبوند الخ الاعلان ده الناس بتسجل فيه بياناتهم عن طريق فورم لو انا بعمله على الفيسبوك او لو انا بعمله على جوجل
العملا دول بيروحوا فين بعد كده؟
في بعض الشركات بتعتمد على الاكسيل شيت وبعض تاني بيعتمد على تدوين داتا العملاء دي يدوي وده طبعا بدائي جدا
فا النظام الافضل من ده كله هو انك تدير العملية دي بشكل اوتوماتيك بالكامل وده بيكون من خلال ال CRM system وده كسيستم بيديلك شوية فوايد لحظات وهتكلم عنها بس خلينا اوضح مثال عشان اكون ماشي في كلامي تاتا تاتا
زي ما احنا عارفين انت ممكن يكون عندك عدد ضخم من العملاء وممكن يوميا في المتوسط سجل معاك من عشرين لخمسين شخص خلينا نقول متوسط عشرين عشان لو انت شركة بميزانية تسويقية محدودة متزعلش اني مبضربش بيك المثل
انت في عندك عشرين عميل محتمل بيسجل يوميا يعني بنتكلم ان عندك في الشهر حوالي 600 عميل محتمل في الشهر الواحد علي مدار السنة بنتكلم في اكتر من 7 الاف عميل محتمل
بالتالي اكتر من 7 الاف عميل محتمل مستحيل تقدر تديرهم بشكل صح وكويس وتستفاد منهم اقصي استفادة وانت معتمد في البيزنس بتاعك انك بتسجل الداتا بتاعتهم علي شيت اكسيل او التدوين اليدوي زي مقلت من شوية
لان انت كشركة بيكون مفترض عندك فريق خدمة عملاء
، فريق مبيعات
ازاي هتنسق كل البيانات دي بشكل يحقق اعلى فاعلية واعلى كفاءةمن ناحية المبيعات ومن ناحية التسويق؟
هنا بقا بيجي دور ال CRM system
اول حاجة بيسمحلك ان البيانات اللي بتتسجل عندك او العملاء اللي بيسجلوا عندك يدخلوا النظام ده وبيكونوا كل عميل بيكون له كارت او فايل خاص بيه علي السيستم عندك بيكون فيه البيانات اللي العميل سجلها او كتبها وهو بيسجل زي مثلا اسمه رقم تليفونه الايميل بتاعه ده مبدئيا
بعد كده خدمة العملاء لو بيتواصلوا مع العميل بحيث يعرضوا عليه ال services والعميل من المكالمة بناخد من العميل ده معلومات زيادة .. طلبات زيادة … بنعرف اكتر احتياجات العميل
بناء عليه مفروض موظف خدمة العملاء بيدخل يسجل البيانات دي في فايل العميل ده عال CRM system ويعمل update لبيانات العميل
فا بعد فترة بيبقى عندي بيانات دقيقة وتفصيلية عن حالة كل عميل.
ده هيفيدني بايه؟ هيفيدني ببساطة اني اقدر اعمل customization للعروض بتاعتي ابعت العرض المناسب للعميل المناسب دي النقطة الاولى
في نقطة تانية نقطة ايه؟ ال tags انا بميز كل مجموعة من العملاء بعلامة مميزة داخل ال system مثلا وليكن العملاء دول انا هسميهم tag باسم class a ده انا عرفت انه عنده قدرة شرائية عالية وفي نفس الوقت بيهتم بالجودة والكواليتي والفيتشرز اللي فيها نوع من انواع الرفاهية
خلاص كده؟ بناء عليه انا مش هبعت له عروض لمنتجات متواضعة او رخيصة لأ هركز معه في العروض في منتجات المنتجات اللي تناسب احتياجاته ممكن يكون عندي عملا تانية class c دول بيشتروا وليكن يهمهم اكتر الشرا بالتقسيط مثلا يهمهم اكتر ان المنتج يكون سعره مش غالي وهكذا
فا كل العملا اللي عندي لما ابعتلهم عرض هبعتلهم عرض يناسبهم مظبوط وعلي مقاس احتياجاتهم العروض دي بتبعتها من خلال الايميل من خلال اتصالات او ايا كان الطريقة اللي هتتواصل بيها مع عملائك
النقطة التالتة طبعا بنك داتا في امان انت بتتحفظ بالبيانات بتاعتك من اي ضياع او اختراق لان كل البيانات دي بتكون متخزنة في نظام سحابي نظام اونلاين مش موجود عندك على الجهاز فلو لا قدر الله الجهاز تلف او حصل اختراق للجهاز او يحصل فيها مشكلة انت في امان والداتا بتكون موجودة على السيستم نفسه
ومن المميزات الاضافية اللي بعتبرها لل CRM system انك طبعا بتكون رابطه مع Facebook ads او google ads انت بالشكل ده الفيسبوك بيقدر انه ياخد تغذية عكسية من البيانات اللي بتحصل او من العمليات اللي بتحصل على نفسه وبناء عليه بيحسن من اداؤه تدريجيا وبيكون مدلعك في الكواليتي ودي نقطة مهمة جدا جدا جداااا
طيب بتنصحنا باي نوع او اي CRM system في عندنا برامج مشهورة كتيررررة هقول منهم اتنين تلاتة
hubspot crm
zoho crm
bitrix24
انا شخصيا عن نفسي بستخدم hubspot ممتاز ، مش مكلف ، عامل integration مع فيسبوك ، محبوب ، محبووووب ، بار بوالديه
هو حرفيا مش مكلف اطلاقا غير بس انا اللي مختار كام features مدفوعة بستخدمهم زي تسجيل المكالمات عشان مراقبة جودة موظفين خدمة العملاء ومكالماتهم مع العملاء يعني في حاجات ممكن ميبقاش حد محتاجها فا تقدر تستخدم hubspot بشكل مجاني
bitrix24
مشكلته هو اولا روسي ساعة متعاملت معاه اعتقد مكلف شويتين وغير كده ملوش integration مع البلاتفورمز المختلفة افتكر ساعة محبيت اربطه بفيسبوك روحت استخدمت third party زي zapier
فا اعتقد hubspot crm هيقضي الغرض
نكتفي بهذا القدر والمرة الجاية ان شاء الله اتكلم عن ال ERP system وده عشق مختلف من نوع خاص انه يكون عندك شئ بيعمل كل اللي بيعمله ال ERP system من ادارة مخازن ومصانع وحسابات وموظفين وفواتير .. عشق بجد مفيش كلام
اترك تعليقاً