نخش في تفاصيل كل نقطة من النقط اللي فعلا كان ليها فرق في معدل الارقام علي مدار 12 شهر تجارب وتغيير من ده لده ومن ابلكيشن نبدله بابلكيشن الخ
نفهم ايه كل نقطة، ليه مهمة، وايه فايدتها علي المدي الطويل ، وازاي ممكن نطبقها علي شوبيفاي او الابلكيشنز اللي بتعملها
ال update category section home page in circles
ايه ده؟
ده شكل تصميمي بيعرض فئات المنتجات بشكل داوير في ال homepage عشان يكون سهل التنقل بينها اقلك زي اللي بتشوفها فين؟ زي اللي بنشوفها في noon.com كده
ليه ده مهم؟
عشان الترتيب البصري مهم جدا لجذب العين لما العميل يدخل الويبسايت ويلاقي كل حاجة منظمة وجميلة ده بيخليه يفضل يتصفح وبيحسن من تجربة المستخدم وبيساعد على تقليل نسبة ال Bounce Rate
الفايدة على المدى الطويل؟
تحسين تجربة المستخدم وده معناه ان العميل هيقضي وقت اطول على الموقع وده بيرفع احتمالية الشراء اكتر
التطبيق على شوبيفاي؟
تقدر تستخدم PageFly عشان تظبط تصميم ال homepage بالشكل ده
ال Savings Banner
إيه ده؟
ده عبارة عن بانر صغير بيظهر فيه الخصومات أو المبالغ اللي هيوفرها العميل لما يشتري منتج معين او باكدج معين او من كولكشن معين
ليه ده مهم؟
عشان الناس بتحب تحس انها واخدة صفقة كويسة وموفرة مبلغ حلو لما تشوف إنك هتوفر مبلغ معين ده بيزود الدافع للشراء وفكرة “التوفير” بتحفز العميل نفسيا وبتخليه يحس بالقيمة المضافة للعرض ده
انا ليه اشتري سبيرو سباتس صغيرة ب 15ج لما ممكن اشتري اللتر ب 20 فاهم ازاي 
الفايدة على المدى الطويل؟
تكرار العروض الواضحة زي دي بيخلق نوع من الولاء والعميل دايما بيرجع عشان يشوف الخصومات التانية ولو منتج استهلاكي فهو بيشتري دايما الحجم الاوفر له
التطبيق على شوبيفاي؟
ابلكيشن Dynamic Banner Suite بيساعدك في الموضوع ده كويس
ال Bundle Upsell
إيه ده؟
ده معناه عرض مجموعة منتجات مع بعض بخصم بسيط لو تم شراؤهم كلهم مع بعض ممكن تحطه في بانر في ال homepage علي باندل منتجات معين او في ال product page نفسها لنفس المنتج اللي العميل داخل عليه
ليه ده مهم؟
ده بيساعدك تزود ال average order value وقيمة المبيعات لأن الاغلب بيفضل انه ياخد العرض بدل ما يشتري كل حاجة لوحدها طالما كمان فيها توفير كويس
اللي هو خدلك ال 3 ب 10 
الفايدة على المدى الطويل؟
هتلاقي ال sales منورة ارقام حلوة بسبب ال average order value كبير وكمان الاستوك لو منتج استهلاكي بيتجدد اول باول لانه مش بيطلع قطعة واحدة بيطلع قطعتين او تلاتة او خمسة كمان
التطبيق على شوبيفاي؟
تطبيقات زي Bundler – Product Bundles
ال Sold Out Soon Message
إيه ده؟
الرسالة دي بتظهر للعميل وتخليه يشوف ان المنتج اللي بيبص عليه خلاص قرب ينتهي من المخزون الرسالة دي حلو اوي لو حطتها تحت ال add to cart button
ليه ده مهم؟
عشان في حاجة اسمها ندرة الوقت أو Scarcity Bias لما العميل يشوف إن المنتج قرب يخلص ده بيخليه يحس بالاستعجال ويقلل فرصة انه يأجل قرار الشراء فا ده بيدفعه انه ياخد قرار أسرع لأنه خايف انه يضيع عليه الفرصة والمنتج يخلص او يا عالم امتي الاستوك هيجدد تاني ويجيلوا منه تاني !
الفايدة على المدى الطويل؟
تطبيق الاستراتيجية دي بيفضل يحفز العملاء على اتخاذ قرارات سريعة بشكل مستمر وده بيزود الكونفرجن بس حاول علي قد متقدر متكونش ضايف الجملة دي علي كل المنتجات لو عندك استور كبير وفيها 2000 برودكت ولا حاجة اعمل category لوحده وسميه ” sold out soon “
التطبيق على شوبيفاي؟
تقدر تستخدم تطبيقات زي Urgency, Countdown Timer Bar للمسدج دي
ال Special Sales Day
إيه ده؟
ده يوم بتعمل فيه عروض وتخفيضات قوية لجذب الناس انها تشتري وتزور الويبسايت في اليوم ده بالتحديد ويكون محدود العروض بعدد ساعات معينة ممكن زي ايه كده؟ زي رنين بيعمل الموضوع ده تلاقي عنده كل اسبوع يقولك يوم الاتنين من الساعة 4 ل 6 في العروض والتخفيضات دي
ليه ده مهم؟
الأيام اللي فيها عروض بتعمل زحمة على المكان لو في عرووض وترافيك عالويبسايت وطبعا مبيعات غير مبيعات باقي ايام الاسبوع والناس بتحب تحس انها بتستغل فرصة مش هتتكرر
الفايدة على المدى الطويل؟
تنظيم أيام مبيعات بصفة دورية بيخلي الناس تستنى المناسبة دي وتستعد للشراء وده بيزود من الاقبال علي الشرا في اليوم ده
التطبيق على شوبيفاي؟
هتلاقي Shopify Launchpad بيساعدك تنظم الأيام دي وتدير العروض
ال Page Speed Booster
إيه ده؟
ده عبارة عن تحسينات تقنية بتتعمل عشان الموقع يفتح اسرع على اجهزة العملاء سواء كان لاب توب او موبايل
ليه ده مهم؟
عشان سرعة تحميل الموقع عامل حاسم في تجربة المستخدم لو الموقع بطيء العميل هيزهق ويخرج قبل ما يخلص تصفحه وده بيؤثر جامد علي ال conversion rate
الفايدة على المدى الطويل؟
تحسين سرعة الموقع بيقلل نسبة ان العملاء تخرج وبيخلي العملاء يقضوا وقت اطول في تصفح الموقع والمنتجات والعروض وشوية ويطلعلهم pop up مثلا يشد انتباهم اكتر وده في النهاية بيزود من فرص الشراء اكتر
التطبيق على شوبيفاي؟
تطبيق Booster: Page Speed Optimizer بيقدم ده
ال Quantity Selector فوق زرار Add to Cart
إيه ده؟
ده ببساطة اختيار بيتيح للعميل يختار كمية المنتجات اللي عاوز يشتريها قبل ما يضيفها للسلة وتكون معمولة ui/ux بشكل كويس وباندل اوفر في نفس الوقت انه لو اشتري 3 مثلا فا ده ال best offer واحلي خصم واوفر سعر
ليه ده مهم؟
في عملاء بيفضلوا يشتروا من الحاجة اكتر من قطعة واحدة من نفس المنتج وده بنشوفو كتير في الخليج ولو الخيار ده مش موجود ممكن يحبط فرصة انهم يشتروا اكتر من قطعة بسبب ان القطعة الواحدة بسعر كذا فهتضاعف عليهم في 3 مثلا انما لما يشوف ان ممكن ياخد ال 3 ب 450 بدل 600 او ال 3 بسعر 2 هيفكر من نفسه يشتري العرض وبعدين يشوف مين الناس اللي ممكن يهديهم بهدية منه
الفايدة على المدى الطويل؟
طبعا زيادة ال Average Order Value وده بيسمع في ال sales وال revenue يا شطور 
التطبيق على شوبيفاي؟
تطبيق Quantity Breaks & Discounts بيسهل الموضوع ده
ال UGC تحت زرار Add to Cart
إيه ده؟
فيديوهات UGC من اللي بنستخدمها في الاعلانات بتتعمل بمقاس معين وتتحط تحت زرار ال add to cart وتشتغل autoplay كمان تكلم العملاء تاني عن المنتج اكتر ليكون نسي الاعلان ولا حاجة
ليه ده مهم؟
ده بيبني ثقة غير مباشرة مع العملاء المحتملين وبيزود من فرص الشراء اكتر
الفايدة على المدى الطويل؟
بما ان الثقة هي العنصر الأهم في اي قرار شراء فا الـ UGC بيساعدك تبني علاقة طويلة المدى مع العملاء بس زود frequency بقا 
التطبيق على شوبيفاي؟
في الاول كنت فاكر ان مفيش تطبيقات علي شوبيفاي بتعمل ده وكان ال developer بيعمله coding في ال theme بس مع التجارب لقيت تطبيقات زي Loox أو Stamped.io بتسهل إضافة الـ UGC بالشكل ده
ال Trust Badges ووقت الشحن المقدر مع رسالة الشحن المجاني
إيه ده؟
ال Trust Badges يعني شارات الثقة زي “مضمون” أو “دفع آمن” وتحط وقت الشحن المقدر بيدي العميل فكرة عن الوقت اللي هيستلم فيه المنتج زي ان المنتج ده هيكون جاهز للشخن والتسليم يوم الاتنين او احصل علي شحن مجاني عند الطلب بقيمة 250 ريال وهكذا
ليه ده مهم؟
عشان العميل عاوز يحس بالأمان وهو بيشتري والشحن المجاني بيخلي العميل يحس إنه بياخد قيمة أعلى والشارات دي بتعزز الثقة وبتطمن العميل إنه مش هيتنصب عليه مثلا
الفايدة على المدى الطويل؟
بناء الثقة بيزيد الولاء وده معناه إن العميل هيرجع تاني ويشتري
التطبيق على شوبيفاي؟
تطبيقات زي Trust Hero وShipping Bar by Hextom بتعمل ده
ال Product Reviews
إيه ده؟
مراجعات المنتجات بتدي الزبون فرصة يشوف تجارب العملاء التانيين مع المنتج مرة ريفيو بكلام بس ومرة ريفيو فيه صور ومرة كمان هيشوف ريفيوز من كومنتات الناس ك social proof
ليه ده مهم؟
المراجعات هي مصدر الثقة الأول عند العملاء لأنها بتوضح إذا كان المنتج فعلاً بيحقق اللي بيتقال عنه وتمام ولا اي كلام
الفايدة على المدى الطويل؟
كلما زادت المراجعات زادت الثقة والمبيعات ده بيساعدك تبني سمعة كويسة للمنتجات بتاعتك
التطبيق على شوبيفاي؟
اعتقد Judge.me من أفضل التطبيقات لكده
ال Email / SMS Cart Recovery
إيه ده؟
دي عملية إرسال إيميلات أو رسايل sms للعملاء اللي سابوا منتجاتهم في السلة وماكملوش الشراء
ليه ده مهم؟
في عملاء بيسيبوا السلة وينسوا أو يترددوا الرسايل دي بتفكرهم وبتشجعهم يكملوا عملية الشراء
الفايدة على المدى الطويل؟
هتقدر تسترجع نسبة كبيرة من العملاء اللي كانوا قربوا يشتروا بس ترددوا
التطبيق على شوبيفاي؟
تطبيقات زي Klaviyo أو SMSBump بتعمل الشغل ده
ال Cart Goal
إيه ده؟
هدف السلة ده ببساطة هو انك تضيف رسالة زي “ضيف منتجات بقيمة كذا علشان تاخد شحن مجاني”
ليه ده مهم؟
عشان دي طرق تحفز العميل إنه يزود مشترياته أو يخلص الشراء بسرعة بدون ما يتردد
الفايدة على المدى الطويل؟
ان قيمة المبيعات بتزيد والعمليات بتكون أسرع عشان ياخد الشحن المجاني ده او ياخد قطعة هدية علي المنتج لو ضاف قطعة كمان الخ
التطبيق على شوبيفاي؟
مفيش تطبيق معين هتلاقي موجود في ثيمات pagefly او ecomposer
ال Autofill Forms
إيه ده؟
ده ببساطة لما العميل ييجي يشتري ويفتح صفحة الدفع بعض البيانات بتتملأ تلقائيا زي الاسم من غير ما العميل يكتب كل حاجة من الأول، زي الاسم، العنوان، ووسيلة الدفع اللي استخدمها قبل كده
لو العميل مشتراش منك قبل كده ال autofil هيكون مفيد في العنوان بس
ليه ده مهم؟
عشان العميل عاوز العملية تكون سريعة وسهلة لو لقى إنه مش محتاج يكتب كل حاجة من الأول هيحس براحة نفسية ويطلب اللي هو عاوزه بسهولة وضغطة زرار وده بيقلل من فرصة إنه يسيب الموقع ويخرج قبل ما يكمل عملية الدفع
زي انا كده علي طلبات مثلا عشان العنوان محفوظ واسمي ورقمي الخ بدوس الاوردر اعمل place order بضغطة زرار حرفيا
الفايدة على المدى الطويل؟
تسهيل العملية بيقلل من نسبة ال Cart Abandonment وبيزود من ال conversion rate بشكل عام
التطبيق على شوبيفاي؟
تطبيق Shopify Payments بيوفر ميزة الملء التلقائي في ال checkout ولو كنت بتستخدم حلول دفع خارجية زي PayPal او Apple Pay فا برضو بيعملوا نفس المهمة
ال Multiple Payment Options
إيه ده؟
ده ببساطة يعني إنك تدي العميل أكتر من طريقة للدفع زي الدفع بالفيزا او البايبال او التحويل البنكي او بالتقسيط او يا ساتر يارب عند الاستلام
ليه ده مهم؟
عشان مش كل العملاء بيفضلوا نفس وسيلة الدفع وتوفير اختيارات بيخلي كل عميل يلاقي الطريقة المناسبة ليه وده بيزود من احتمالية انهم يكملوا الشراء وكمان حاول تستفيد من لوجو الشركات المشهورة في الدفع حسب السوق اللي انت شغال فيه في مصر مثلا توفير لوجو فاليو وتيلدا فرق في ال conversion rate ان فيه عدد يوزر محترمين بيستخدموا ابلكيشن زي تيلدا شافوا في الويبسايت عندنا لوجو كارت معاهم في جيبهم
الفايدة على المدى الطويل؟
كل مزودت من اختيارات الدفع كل مزادت فرصة تحويل الزوار لعملاء اخرابي عالحكم
فا ده بيقلل نسبة الناس اللي بيسيبوا الموقع لمجرد إن وسيلة الدفع مش مناسبة ليهم
التطبيق على شوبيفاي؟
تقدر تضيف اختيارات الدفع دي بسهولة من اعدادات الدفع في Shopify او Shopify Payments برضو او Stripe الخ
ال Segmented Offers
إيه ده؟
دي عروض بتتصمم حسب سلوكيات العملاء المختلفة مثلا العملاء اللي بيشتروا باستمرار ممكن تقدم لهم خصومات مختلفة عن العملاء اللي بيزوروا الموقع لأول مرة
ليه ده مهم؟
عشان الاستهداف بيخلي العميل يحس ان العرض معمول ليه مخصوص ده مش بس بيزود فرصة ال conversion لكن كمان بيخلق علاقة ولاء بينك وبين العميل
نفس الكلام في الاعلانات وتقسيم ال audience ل cold و warm و hot وده اتكلمت فيه قبل كده
الفايدة على المدى الطويل؟
العملاء اللي بيحسوا انهم مميزين او انك فاهم احتياجاتهم بيكونوا ميالين اكتر انهم يرجعوا يشتروا مرة تانية منك وده بيزود ال Customer Lifetime Value
التطبيق على شوبيفاي؟
تطبيقات زي Klaviyo أو Seguno بتتيح لك تعمل كامبينز بناء على بيانات العملاء
النتيجة النهائية 
تطبيق كل العناصر دي على مدار 12 شهر هيغير شكل الـ Conversion Rate بتاعك بشكل كبير والمبيعات هتزيد لأنك
هتحسن تجربة المستخدم
وتقلل من نسبة الناس اللي بيسيبوا السلة
وتزود من قيمة السلة نفسها
وتعمل علاقة ولاء بينك وبين العملاء
لو اشتغلت على الحاجات دي صح هتلاحظ ان المبيعات بتزيد شهر بعد شهر والـ ROI بيبقا احسن وبنيت براند ليه عملاء دايمين وبيرجعوا يشتروا مرة واتنين وعشرة
كل نقطة هنا بتخدم هدف محدد سواء كان
تسهيل تجربة الشراء
بناء الثقة مع العملاء
تحفيزهم على الشراء بكميات اكبر
وعشان تشوف نتيجة ملموسة لازم تحط خطط وتعمل تراكينج من نفسك لكل نقطة وتشوف ازاي بتأثر على الأرقام
واخيرا التطبيقات دي مش معناه ان مفيش غيرها انك تستخدمها يمكن يكون في غيرها احسن كتير بس انا معرفوش ومجربتوش اكيد مش كل الابلكيشنز بتخدم كل المتاجر ولا كل المتاجر محتاجة كل الابلكيشنز فا مش كل التطبيقات بتقدم نفس الفعالية فا اعتمد علي انه تجرب وتختبر دايما وشوف ايه اللي بيحقق أفضل النتايج مع جمهورك
واه حاجة اخيرة بقا ” ليكم شوقة والله “
اترك تعليقاً