ماجد هو ايه بالظبط ال Marketing Mix؟ طب هو ايه اختصار ال 4Ps ده وهو 4Ps بس ولا 7Ps كمان؟ 
طب عشان الامور تكون بسيطة للي لسه ميعرفش المصطلحات والاختصارات دي عبارة عن ايه فا ال Marketing Mix او بلغتنا احنا (المزيج التسويقي) هو برواز وحدود لينا عشان نخطط وننفذ استراتيجيات تسويق بناءا عليه
الفكرة الاساسية فيه انه بيغطي كل الجوانب اللي بتأثر على نجاح المنتج أو الخدمة اللي بنخطط ليها في السوق اللي بنرتب اننا نشتغل عليه وبيتكون من 4 معروفة بال 4Ps :
ال 4P دول بقا اختصار اول حرف من
ال Price – السعر
ال Place – المكان
ال Promotion – الترويج
فيما بعد المفهوم تطور واتضافت له عناصر تانية لما الشركات بدأت تركز على العملاء بشكل أكبر لكن اولا خلينا نبدأ بالأساسيات اللي هما ال 4P
المنتج (Product) :
المنتج هو اللي بتقدمه للعملاء سواء كان سلعة ملموسة زي الملابس أو الالكترونيات او خدمة زي تصميم المواقع او الاستشارات القانونية
واحنا بنخطط المرحلة دي في أسئلة لازم نجاوب عليها هنا :
ايه القيمة اللي المنتج بيقدمها للعملاء؟
ايه ال unique selling point اللي بتفرقه عن المنافسين؟
هل في طلب على المنتج او الخدمة دي في السوق؟
طب ولو في قد ايه حجم الطلب اللي عليه؟
هل التصميم والجودة او التعبئة والتغليف مناسبين للجمهور المستهدف بيه المنتج ده؟
مثلا دلوقت انا شركة هتنتج موبايل جديد في السوق
لازم اركز على مميزاته التقنية زي البطارية والكاميرا والمعالج عشان ايه اللي يخلي موبايلي يتميز وسط ايفون وسامسونج واوبو؟ عندي بطارية قوية؟ عندي كاميرا قوية؟ عندي سعر منافس؟ وكمان اطمن ان تصميمه يناسب شريحة العملاء المستهدفة زي الشباب او رجال الأعمال
السعر (Price) :
والسعر ده القيمة اللي العميل بيدفعها عشان يحصل على المنتج او الخدمة وتحديد السعر بيكون بناءا على عوامل زي :
تكاليف الإنتاج
اسعار المنافسين
القيمة اللي العميل شايفها في المنتج
قدرته الشرائية
والتسعير ليه استراتيجيات زي :
اختراق السوق (Penetration Pricing) : فيها بنحدد سعر نسبيا رخيص عشان نجذب بيه اكبر شريحة من طبقات السوق واكبر عدد من العملاء والاسم ينتشر
تسعير بريميوم (Premium Pricing) : وده بنحدد فيه سعر عالي عشان المنتج يبان فاخر او عالي الجودة مش اي فئة ولا شريحة من الناس تقدر تشتريه
مثلا rolex ساعة بريميوم وفاخرة السعر بتاعها لازم يعكس القيمة والتميز فيها في حين ان ساعات اقتصادية زي Casio التسعير فيها لازم يبقى منافس
المكان (Place):
المقصود بالمكان هو الطريقة او القنوات اللي بنوصل بيها المنتج للعملاء والهدف هنا ان العميل يقدر يلاقي المنتج بسهولة في المكان اللي يناسبه
أنواع القنوات التسويقية دي :
قنوات تقليدية : زي المحلات والسوبرماركت
قنوات إلكترونية : زي المواقع الإلكترونية ومنصات التجارة الإلكترونية زي نون وامازون
توزيع مباشر : المنتج بيوصل للعميل مباشر من المصنع او الشركة
توزيع غير مباشر : المنتج بيوصل للعميل من خلال موزعين او تجار الجملة
مثلا شركة بتبيع ملابس رياضية ممكن تبيع منتجاتها من خلال متجرها الإلكتروني وكمان من خلال متاجر التجزئة زي Decathlon
الترويج (Promotion) :
الترويج هو الوسائل اللي بتستخدمها الشركة عشان توصل رسالتها التسويقية وتلفت انتباه العملاء للمنتج او الخدمة بتاعتها
أدوات الترويج دي :
الإعلانات : على التلفزيون والسوشيال ميديا وGoogle Ads
العروض الترويجية : زي الخصومات او الهدايا مع المنتج لما تشتريه او زي سلسلة اعلانات جمع وادخل سحب علي مليون جنيه او عربية سوزوكي
العلاقات العامة (PR) : دي معتمدة علي network ونشر feedback ورأي إيجابي عن الشركة أو المنتج وترشيحهم لغيرهم من الناس
مثلا لو عندنا مطعم جديد ممكن نعمله كامبين على Instagram ونوضح فيها شكل المكان والاطباق اللي بنقدمها والاسعار والعنوان وخصم 20% لكل شخص عامل فولو 
طبق الكشري لو ب 40 وانت عاملي فولو والله لتحاسب علي 32 بس
طب نختم بإزاي العناصر دي بتشتغل مع بعض؟ مهو marketing mix بقا 
تخيل انك بتنتج منتج جديد وهو عصير طبيعي صحي
ال P منتج : عصير مصنوع من مكونات طبيعية 100% من غير سكر مضاف
ال P سعر : تسعير اعلى شوية من العصاير العادية في السوق عشان تستهدف جمهور بيهتم بصحته
ال P مكان : نوفر المنتج في السوبرماركت الكبيرة ونبيعه على منصات زي Talabat
ال P ترويج : كامبين على السوشيال ميديا تبين مزايا وفوايد العصير الطبيعي عن العصاير التانية اللي مضاف ليها سكر مع عينات مجانية تتوزع في الجيمات والنوادي الرياضية
إضافة ال 3Ps الجديدة :
لما التسويق اتطور بمرور الوقت اتضاف عناصر جديدة للمزيج التسويقي عشان تناسب الخدمات والعملاء بشكل أكبر :
ال People – الأشخاص :
ودي الناس اللي شغالة معاك علي المنتج او الخدمة لان الجودة مش بس في المنتج لكن كمان في الفريق اللي بيتعامل مع العملاء زي خدمة العملاء وموظفي المبيعات
ال Process – العمليات :
وهو إزاي الخدمة بتتقدم؟ زي سرعة التسليم او تجربة الشراء نفسها من تغليف للمنتج وشكل عبوته الخ
ال Physical Evidence – الدليل المادي :
لو بنقدم خدمة مش ملموسة زي الاستشارات ازاي العميل يعرف ان الجودة مضمونة؟ ممكن تكون شهادات عملاء يعرفونا واتعاملوا معانا قبل كده وعملنا حاجة فعلا صنعت معاهم فرق وقالوا شهادة ايجابية فينا ولا ممكن لو انا محامي يفرق معاهم شكل المكتب وفخامته مثلا حاجة ليفل فريد الديب فبريكة برة وجوة كده
كده ال marketing mix كام 4Ps بس ولا 7Ps؟
اترك تعليقاً